Noticias
Día mundial das enfermidades raras, 2020
Acto principal con motivo do día mundial no Complexo Hospitalario Universitario de Santiago
28/02/2020 | Galicia
Coa presenza de representantes de todos os ámbitos da Comunidade Autónoma de Galicia, este venres 28 de febreiro ás 11:30h no Hall do Hospital Clínico Universitario de Santiago (CHUS), a sociedade galega uniuse para apoiar ás enfermidades raras coa celebración do Día Mundial das Enfermidades Raras que se celebra en todo o mundo o día 29. Persoas de todos os ámbitos, encabezadas polo Conselleiro de Sanidade Jesús Almuiña, mostraron a súa implicación reconstruíndo un quebracabezas que simboliza, nunha imaxe dunha gran montaña, o esforzo colectivo para conseguir entre todos este obxectivo común de dar visibilidade a estas enfermidades e a quen as padece.
No acto, guiado pola actriz Isabel Blanco, representantes do ámbito institucional, artístico, político, sanitario, empresarial, educativo, da comunicación, a cultura e o deporte, representado a todos os galegos, simbolizaron a consecución deste obxectivo de concienciación. Foron protagonistas especiais os afectados de enfermidades raras, familiares e as asociacións de pacientes, verdadeiros merecedores dun recoñecemento da sociedade no seu conxunto.
Finalizou o acto coa lectura dun Manifesto que resumiu a vontade e algúns dos avances que aos poucos permiten avanzar no que é un longo camiño aínda por percorrer.
Arquivada en:
Infórmate > Noticias